ଗଜପତି ମହାରାଜ ଶ୍ରୀ ଶ୍ରୀ ଦିବ୍ୟସିଂହଦେବ ମହାରାଜଙ୍କ କରକମଳରେ ଅଯୋଧ୍ୟାରେ ଶ୍ରୀରାମଙ୍କ ଭବ୍ୟ ମନ୍ଦିର ନିର୍ମାଣ ପାଇଁ ନିଧି ସମର୍ପଣ ଓ ସଂପର୍କ ଅଭିଯାନର ଶୁଭାରମ୍ଭ

ଭୁବନେଶ୍ୱର: ଅଯୋଧ୍ୟାରେ ମର୍ଯ୍ୟାଦା ପୁରୁଷୋତମ ଶ୍ରୀରାମଙ୍କ ଭବ୍ୟ ମନ୍ଦିର ନିର୍ମାଣ ପାଇଁ ଓଡିଶାର ତିନିକୋଟି ଭକ୍ତଙ୍କର ସହଯୋଗ ପ୍ରାପ୍ତି ନିମନ୍ତେ ନିଧି ସମର୍ପଣ ଓ ସଂପର୍କ ଅଭିଯାନ ଗଜପତି ମହାରାଜ ଶ୍ରୀ ଶ୍ରୀ ଦିବ୍ୟସିଂହଦେବ ମହାରାଜଙ୍କ କରକମଳରେ ଶୁଭ ଉଦ୍‌ଘାଟିତ ହୋଇ ଯାଇଛି । ଆଜି ଶ୍ରୀରାମ ଜନ୍ମଭୂମି ମନ୍ଦିର ନିଧି ସମର୍ପଣ ସମିତି, ଓଡିଶାର ଅଧ୍ୟକ୍ଷ ପ୍ରଫେସର ଡଃ.ପ୍ରଫୁଲ ମିଶ୍ର, ଉପାଧ୍ୟକ୍ଷ ଶ୍ରୀ ମନସୁଖଲାଲ ସେଠିଆ, ସମ୍ପାଦକ ଶ୍ରୀ ଗୋପାଳ ପ୍ରସାଦ ମହାପାତ୍ର ଓ ରାଷ୍ଟ୍ରୀୟ ସ୍ୱୟଂସେବକ ସଂଘ, ଓଡିଶା ପୂର୍ବ ପ୍ରାନ୍ତର ପ୍ରାନ୍ତ ସଂଘଚାଳକ ଶ୍ରୀ ସମୀର କୁମାର ମହାନ୍ତି ଭୁବନେଶ୍ୱରର ସହିଦନଗର ସ୍ଥିତ ଗଜପତିଙ୍କ ବାସଭବନ ଦିବ୍ୟଧାମରେ ପଂହଛି ଥିଲେ । ଗଜପତି ମହାରାଜ ଓ ମହାରାଣୀ ସ୍ୱାଗତ କରିବା ସହିତ ଅଯୋଧ୍ୟାରେ ଶ୍ରୀରାମ ମନ୍ଦିର ନିର୍ମାଣ ପାଇଁ ନିଜର ସହଯୋଗ ନିଧି ପୁଷ୍ପାର୍ପଣ ସହିତ ସମର୍ପଣ କରିଥିଲେ । ସମିତି ତରଫରୁ ଗଜପତି ମହାରାଜଙ୍କ ପରିବାରକୁ ନିଧି ସମର୍ପଣର ରସଦି, ଶ୍ରୀରାମ ମନ୍ଦିରର ଫଟୋ ଓ ଶ୍ରୀରାମ ମନ୍ଦିର ସଂପର୍କିତ ପରିକଳ୍ପନା ତଥ୍ୟାବଳୀ ପ୍ରଦାନ କରାଯାଇଥିଲା ।
ଶ୍ରୀଶ୍ରୀ ଗଜପତି ମହାରାଜ ନିଧି ସମର୍ପଣ କରି କହିଲେ ଯେ ଶ୍ରୀରାମ ମନ୍ଦିର ନିର୍ମାଣ କାମ ଅତିଶୀଘ୍ର ଆରମ୍ଭ ହେଉ ଓ ଅତିଶୀଘ୍ର ଶେଷ ହେଉ । ସମସ୍ତେ ଏହି ମନ୍ଦିର ନିର୍ମାଣ କାର୍ଯ୍ୟରେ ନିଜର ସହଯୋଗର ହାତ ବଢାନ୍ତୁ ।
ଏହାପରେ ସମିତିର କାର୍ଯ୍ୟକର୍ତାମାନେ ଓଡିଶାର ରାଜଭବନକୁ ଯାଇଥିଲେ । ସେଠାରେ ମହାମହିମ ରାଜ୍ୟପାଳ ପ୍ରଫେସର ଶ୍ରୀ ଗଣେଶୀଲାଲ ମନ୍ଦିର ନିର୍ମାଣ ପାଇଁ ନିଧି ସମର୍ପଣ କରିଥିଲେ ।
ଏହି ଅବସରରେ କେନ୍ଦ୍ରମନ୍ତ୍ରୀ ଶ୍ରୀ ଧର୍ମେନ୍ଦ୍ର ପ୍ରଧାନ, ବିଜେପିର ରାଷ୍ଟ୍ରୀୟ ଉପାଧ୍ୟକ୍ଷ ଶ୍ରୀ ବୈଜୟନ୍ତ ପଣ୍ଡା, ସମ୍ବାଦର ସଂପାଦକ ଶ୍ରୀ ସୌମ୍ୟ ରଂଜନ ପଟ୍ଟନାୟକ, ଭୁବନେଶ୍ୱର ସାଂସଦ ଶ୍ରୀମତୀ ଅପରାଜିତା ଷଡଙ୍ଗୀ ନିଧି ସର୍ମପଣ କରିଥିଲେ । ଏଥି ସହିତ ଅନେକ ମାଣ୍ୟଗଣ୍ୟ ବ୍ୟକ୍ତି ତଥା ସହରର ବିଭିନ୍ନ ବସ୍ତିରେ ରାମଭକ୍ତ ଭାଇ ଭଉଣୀ ମାନେ ଅଯୋଧ୍ୟାରେ ଶ୍ରୀରାମ ମନ୍ଦିର ନିର୍ମାଣ ପାଇଁ ନିଧି ସମର୍ପଣ କରିଛନ୍ତି ।
ସୂଚନା ଯୋଗ୍ୟ ଯେ,ଏହି ଅଭିଯାନ ୧୪ ଜାନୁୟାରୀରୁ ୨୭ ଫେବୃୟାରୀ ପର୍ଯ୍ୟନ୍ତ ଚାଲିବ । ଏହି କ୍ରମରେ ପୂର୍ବ ଓଡିଶାରେ ଜାନୁୟାରୀ ୧୫ ତାରିଖରୁ ଜାନୁୟାରୀ ୩୦ ତାରିଖ ପର୍ଯ୍ୟନ୍ତ ଏହି ଅଭିଯାନ ଚାଲିବାକୁ ଥିବା ବେଳେ ପଶ୍ଚିମ ଓଡିଶାରେ ଜାନୁଆରୀ ୨୫ରୁ ଆରମ୍ଭ ହୋଇ ଫେବୃଆରୀ ୧୦ ତାରିଖ ପର୍ଯ୍ୟନ୍ତ ଚାଲିବ । ପୂର୍ବ ଓଡିଶାରେ କାର୍ଯ୍ୟକର୍ତାମାନଙ୍କ ମାଧ୍ୟମରେ ୧୬ଟି ଜିଲ୍ଲାର ୩୨,୦୦୦ ଗାଁକୁ ସଂପର୍କ କରାଯିବ । ସେହିପରି ପଶ୍ଚିମ ଓଡିଶାରେ ୧୪ଟି ଜିଲ୍ଲାରେ କାର୍ଯ୍ୟକର୍ତାମାନଙ୍କ ମାଧ୍ୟମରେ ୧୯,୦୦୭ ଗାଁକୁ ସଂପର୍କ କରାଯିବ ବୋଲି ଯୋଜନା କରାଯାଇଛି । ଓଡିଶାରେ ତିନି କୋଟିରୁ ଉର୍ଦ୍ଧ୍ୱ ଲୋକଙ୍କୁ ସଂପର୍କ କରାଯାଇ ନିଧି ସଂଗ୍ରହ କରାଯିବ ବୋଲି ସ୍ଥିର କରାଯାଇଛି । ସମିତିର କର୍ମକର୍ତାମାନେ ଘରକୁ ଘର ଯାଇ ସଂପର୍କ କରିବା ସହିତ ନିଧି ସଂଗ୍ରହ କରିବେ । ଏଥିପାଇଁ ୧୦ଟଙ୍କା ,୧୦୦ଟଙ୍କା ଓ ୧୦୦୦ଟଙ୍କା ପରିମାଣର କୁପନ ମାଧ୍ୟମରେ ନିଧି ସଂଗ୍ରହର ଯୋଜନା ପ୍ରସ୍ତୁତ କରାଯାଇଛି । ଏତଦ୍ ବ୍ୟତୀତ ନିର୍ଦ୍ଧାରିତ କୁପନ ପରିମାଣରୁ ଅଧିକ ରାଶି ସମର୍ପଣ ପାଇଁ ରସିଦର ବ୍ୟବସ୍ଥା ମଧ୍ୟ କରାଯାଇଅଛି । ଏହି ପବିତ୍ର କାର୍ଯ୍ୟରେ ଯଥାଶକ୍ତି ଯୋଗଦାନ କରି ଆପଣାମାନେ ପୁଣ୍ୟକାର୍ଯ୍ୟରେ ସହଭାଗୀ ହୁଅନ୍ତୁ ବୋଲି ସମିତିର ସଂପାଦକ ଶ୍ରୀ ମହାପାତ୍ର ନିବେଦନ କରିଛନ୍ତି ।